طيب انا دلوقتي عاوز اشتري فلتر ، عشان اضمن جودة مياة لي ولاسرتي واولادي ... اعرف ازاي إن الفلتر ده كويس ولا لا .. هيديني مياه صحية ولا لا .. 

إن شاء الله في المقال ده هنحاول نوصلك للحقيقة بشكل مبسط وسهل ... 

السلام عليكم ورحمه الله وبركاته... أهلا بكم في فيديو جديد .. الفيديو ده اهم فيديو في القناة فلو سمحت عاوزك تركز جدا في كل كلمة وكل حرف هيتقال ... فاعمل كوب قهوه او شاي وتعالي عشان الموضوع فعلا مش هين ...

انت دلوقتي قررت تشتري فلتر .. بتروح تسال عن الفلتر بتلاقي تفاوت كبير في الأسعار... فبتحتار وتتوه ومش عارف توصل للحقيقة... اللي يقولك امريكي ، واللي يقولك تايواني واللي يقولك سيبك من النصابين كل اللي موجود صيني.. طيب

الموضوع باختصار.. أسأل نفسك سؤال انت مشتري الفلتر ليه اصلا ..؟! عشان تاخد مياه نقية وده بديل اوفر من شراء المياه المعبأة ، كمان اضمن بكتير ... وخليني اقولك إنه للأسف ممكن تشتري فلتر ميأديش الغرض منه بل ممكن يكون مضر .. ايوه .. مضر .. وعشان تعرف التفاصيل يالا بينا نبدا

الفيديو ده هنشرح ٣ محاور رئيسية لازم تفكر فيهم مليون مرة قبل ما تشتري الفلتر.. 

المحور الاول .. الصحة 

المحور الثاني .. الاستدامة

المحور الثالث.. التسعير ( الفلوس)

ولازم الفلتر عشان يكون جيد يحقق الثلاث محاور بتوازن.. وخليني اكون دقيق معاك أن محور الصحة لا يمكن التهاون فيه ولو ١ في المئة.. 

وينفع نلعب في المحورين التانيين.. 

الفلتر المنزلي السبع مراحل بيتكون من اكتر من ٣٠ عنصر أو قطعة وان كانت بعض القطع مكررة زي الخراطيم واكواع التوصيل ، لكن الشاهد من العدد أنك ممكن تتغش ٣٠ مرة وممكن تتغش ٢٥ مرة وممكن تتغش ١٠ مرات فقط .. 

من اول محبس تغذية الفلتر ووصلة السباكة ١/٢ بوصه أو ٣/٤ .. لحد الحنفية اللي هتشرب منها كل ده فيه منه مصنع من خامات صحية لا تتفاعل مع المياه ، وفيه منه معمول من خامات غير صحية تتفاعل مع المياه وتنتج مركبات أكثر ضررا من وجود المياه بدون فلتر .. 

وخليني اقولك إن أغلب ال٣٠ عنصر دول من البلاستيك من اول الهاوزينجات والشمعات والبلاستيك الموجود في الموتور والممبرين ..الي آخر الشمعات ..

فإما أن يكون البلاستيك بيور صحي لا يتفاعل مع المياه أو أنه يكون عكس ذلك .. 

طيب خلونا نضرب مثال .. ده هاوزينج مكتوب علي made in Taiwan.. وده هاوزينج مكتوب عليه made in Vietnam .. الاول صناعة مصري .. بلاستيك يتفاعل مع المياه .. طيب شوفوا الصورة دي كده ... ده بعد مرور ٦ شهور فقط من تركيبة

طيب الفرق في السعر كبير .. يبقي انت لو اخترت المصري الرخيص اول شئ محور الصحة هناخد منه ثاني شيء محور الاستدامة هناخد منه لأنه هيتعبك في الفك والربط ومش هيتحمل ضغط مياه عالي .. 

الشمعة البولي الأولي ليها مواصفات قياسية ، اللي عاوز يبيع بكميات كبيرة وسعر قليل .. عنده بدائل أما أنه يقلل الوزن بخامة كويسة.. أو أنه يلعب في الابعاد القياسية .. أو يسيب الوزن مظبوط بس الخامة تكون رديئة.. ومش عاوز اتكلم عن مادة الاوميا .. اللي في اكتر من تقرير اتكلم عن أنها بتسبب سرطان ..وده كفيلة أنها تضاعف كمية البولي لعشر اضعافه..وربنا يعافينا 

الشمعة الثانية ممكن يقلل لك كمية الكربون أو أنه يحط كربون مش مطابق للمواصفات الصحية اصلا 

وبالمناسبة هسيب لكم فيديوهات عن الشمعة الأولي والثانية.. هتلاقوا فيهم توضيح اكتر .. 

كذلك الموتور هتلاقي موتور زي ده محفور عليه تايواني .. وده كمان وده كمان .. كل دول ولا واحد فيهم تايواني .. تخيل الموتور ده تايواني أصلي ماركة محترمة على الرغم أنه مش محفور عليه 

( يتم وضع فيديو لموتور بيوركم ) 

كمان الخزان ..الخزان ده اخر محطة بتخزن فيه المياه قبل الخروج للاستخدام وبيتعمل من مواد عالية الجودة لا تتفاعل مع المياه نهائيا.. 

تخيل لو جبت خزان رخيص .. أو شئ مش هتضمن جودة المياه ..تاني شيء مش هيكمل معاك سنة أو سنتين وهتغيره ... 

كمان الشمعات اللي فوق بلاستيك وفيه ميديا معينة سواء كربون أو صخور . ممكن يحطلك صخور اصلا مضرة . وده يفسر لي . اتصل علي عميل وقالي إن طعم المياه عنده سئ جدا لدرجة أنه أسوأ من الحنفية روحتله قالي انا اشتريت الشمعة الحماسة والسادسة والسابعة .. روحت علطول جبتله مياه من بعد الممبرين مباشرة .. داق المياه واستغرب أن المياه طعمها افضل بكتير من بعد الشمعات .. ده يفسر لكم حجم الغش اللي وصلنا ليه ... 

طيب بعد كل ده. انت كعميل هتعرف إزاي الفرق بين الاصلي من المضروب ... اول حاجة هتجيب الفلتر من واحد موثوق منه .. وده أمر بقي في غاية الصعوبة حاليا .. لأن كله هيقولك أن اللي عنده أفضل حاجه

طيب ايه الحل التاني .. متتغرش بالخصومات والعروض .. واهم شيء وده شئ متاح للجميع.. أسأل أهل الخبرة ... اتعب شوية وادخل علي جروبات الفيس بوك واليوتيوب وابحث عن الفلتر .. ابحث قبل ما تشتري .. مش تروح تشتري وفي الاخر تصور وتقول ايه رايكم... قبل ما تشتري 

وبعد كل ده لو موصلتش ومحتار تختار إيه ..اكتب لي في التعليقات أو على الواتس وانا تحت امر الجميع اشوفكم على خير.. السلام عليكم