حاجات تاخذ بالها منها قبل ما تشتري فلتر المياه

 ثلاث حاجات مهمة لازم تاخد بالك منها كويس عشان متخسرش فلوسك لو قررت تشتري فلتر ٧ مراحل في 2022

السلام عليكم ورحمة الله وبركاته . انا محمود ياقوت متخصص صيانة وتركيبات في فلاتر المياه المنزلية ، وفي الفيديو ده هقولك على تلت عناصر أساسية لازم تاخد بالك منها كويس وتتاكد أنها اصلية مش مضروبة وده عشان متخسرش فلوسك على الأرض .. 

من فترة تواصل معايا عميل على الواتس اب وبالمناسبة اللي عنده اي استفسار انا سايب رقم الواتساب في وصف الفيديو وتحت امر الجميع .. المهم قالي انا حجزت فلتر سبع مراحل ومحتاج أتأكد من نوعه ، هنا هيجلينا سؤال طيب إزاي هو حجز وبعد ما حجز حاله قلق وخاف وحب يطمن ، اجاوبكم واقولكن إن كتير من الشركات بتلح على العملاء وبطرق طرق استفزازية لإجبار العملاء على شراء الفلتر ، ربنا يهدي الجميع .

المهم قولتله ابعت صورة الفلتر فراح باعت الصورة دي ، قولتله معلش محتاج صورة واقعية مش صورة على كرتونة أو ورق دعايا لأن في الواقع مش هيجيلك اللي في الصورة المهم اتصل بالشركة قالهم محتاج صورة لعميل ركب منكم . فيها الصوره دي .  فطبعا سألته عن السعر عشان يبقي التقييم حقيقي ، ولما قالي السعر قلتله السعر مناسب للفلتر لأن موتوره اصلي ماركة محترمة اسمها فلوكستك .  

المهم تمام تمام . السلام عليكم .. بعدها بيوم لقيته بيقولي أن الشركة ركبت الفلتر ودي صورته ، قولتله اوبا .. مش ده الفلتر اللي قاله عليه الموتور متغير ، عموما الموتور اللي جالك هيتعبك ..قالي والعمل قولتله اتصل بالشركة وقولهم انا عاوز اللي في الصورة .. وفضل في خناق مع الشركة ، ومع مرور اول يوم وتاني يوم لاحظ أن للموتور ضعيف وأنه مش بيفصل وان ضغط المياه في الحنفيه ضعيف .. قلتله مش قلتلك .. المهم بعد تلت ايام الشركة بعتت له الموتور الاصلي .

والحمد لله المشكلة اتحلت والفلتر بقي زي الفل ..

الفرق في السعر بين الموتور الاصلي والتقليد حوالي 300 أو اكتر ..  ولو انت مهتم انك تشتري فلتر الفتره دي لازم تعرف اهم ثلاث قطع في الفلتر السبع مراحل ، وطبعا اهميتهم تيجي بسبب سعرهم المرتفع ، وانهم من القطع طويلة المدي في الجهاز واللي مش بتتغير بشكل مستمر ... بتفضل سنين وطبعاً ولو اشتريت انواع ضعيفة هتتكلف مبالغ كبيرة لو حبيت تغييرها ..

أول قطعة وهو القلب النابض في الفلتر. .وهو المضخة أو موتور الفلتر ، وزي ما شفتوا في الحالة اللي ذكرتها في أول الفيديو العميل كان هيضحك عليه في الموتور  وعشان تجيب موتور كويس مش اقل من 500ج ، وانا كنت خصصت حلقة عن افضل خمس مواتير الفلتر انا اشتغلت فيهم خلال عشر سنين .. هسيبهالكم في الوصف وهتيجي في علامة I

القطعة الثانية المهمة جداً في الفلتر هي خزان الفلتر ، وطبعا من اغلي القطع في الجهاز النضيف طبعا ، مش اقل من 650ج ووظيفته تخزين المياه ، وإعادة رفع ضغط المياه في حنفية الفلتر .. وطبعا مهم جدا يكون الخزان مصنوع من مادة لا تتفاعل مع المياه .. وبالنسبة لاعطاله سيب لكم حلقة في الوصف عن اشهر عطل وكيفية صيانته ..

القطعة الثالثة والأخيرة من الحاجات المهمة في الفلتر هي الشمعة الرابعة أو شمعة الاملاح أو وحدة RO أو ما يعرف بالممبرين ، وفي الفترة الأخيرة ظهرت انواع كتير جدا في السوق المصري منها الجيد ومنها الردئ ، وعشان تشتري ممبرين كويس الفتره دي مش اقل من 350ج ، وطبعا هسيب لكم حلقة كاملة شرحت فيها نظام تشغيل الشمعة دي وأبرز الشمعات الكويسه .. 

في نهاية الفيديو اتمني يكون الفيديو مفيد لكل اللي شافوه ومتنساش تعمل لايك للفيديو ومشاركة عشان المعلومة لناس اكتر ..  لو اول مره تشوفني ومهتم بفلاتر المياه المنزلية ، اعمل اشتراك في القناة. وفعل الجرس على الكل عشان يجيب كل الفيديوهات الجديدة .. اشوفكم على خير . السلام عليكم